MUDELLIZAZIONE DI U CUMPURTAMENTU

Rispunsevule

Pr. Antoine Aiello

Prublematica

In u quadru di i travagli scentifichi mossi nat’à a piattaforma STELLA MARE nant’à u studiu di l’ambiu marinu, a prublematica di u cutteghju di u cumpurtamentu di e spezie hè assai impurtante. Infatti, l’elaburazione di cundizioni d’osservazione addatte in un quandru induve l’invenzioni di l’omi sò naturalmente scarse, pè capisce megliu i cumpurtamenti, i bisogni è l’interazzione di e spezie studiate cù l’ambiu, hè impurtantissimu d’un puntu di vista scentificu è tecnologicu.

Uggettivi

L’uggettivu d’issu studiu hè di custruisce un sistemu di racolta d’infurmazione chì si basa nant’à rete, in tempu reale, permettendu di furnisce i dati necessari à l’elaburazione è a validazione d’un mudellu di simulazione cumpurtamentale, d’analisa di a dinamica di e pupulazioni è di l’interazzione indu u quadru di a rete di l’ecusistemi studiati. Cusì, u prugettu di ricerca è di sviluppu porta nant’à a cuncipitura d’un Sistemu d’Infurmazione pè u cutteghju glubale di e spezie aliotiche.

Descrizzione :

Issu prugettu di mudellizazione cumpurtamentale di e spezie aliotiche, hè cuncipitu nant’à dui assi:

• 1: nant’à u studiu è a messa in pratica di a rete di sensori senza filu (RCSF), fin’ora studiati in duminii varii (studii nant’à i fochi, nant’à i sistemi idrichi...) oramai aduprati ancu in l’ambiu marinu.
• 2: nant’à mudelizzazione è a simulazione per via d’un furmalismu à fatti discreti (DEVS) è u prugrammu infurmaticu pè u studiu di l’ambiente DEVSymPy.

Azioni da mette in anda

• In ‘ssa parte hè prevista a messa in pratica di e rete di sensori (accustichi è videò): tracking per via di a geo-lucalizzazione è racolta d’antri dati nant’à e spezie: mudalità di caccia, numaru di prede – spezie è quantità – zone d’attività sicondu l’età, periudu annuale, ecc...) In pratica, avaremu da chjappà è mette u sensore nant’à l’individui maiò è lentalli pè cutteghjalli in e zone da 0 à 200 metri di prufundezza. L’infurmazione cusì racolte seranu analizate attempu à i risultati di i studii è e analise biologiche per arricchisce e cunniscenze nant’à u cumpurtamentu di e spezie. U nostru uggettivu finale hè di custruisce un mudellu chì possa unisce tutte l’infurmazione colte è mettele in dinamica per via di a simulazione è i fatti discreti. Issa metudulugia, basata nant’à u studiu di sistemi cumplessi hà cume uggettivu di furnisce à l’attori di u duminiu (cercatori, prufeziunali, manager...) i mezi necessari à una capiscitura più bona à u serviziu d’una gestione duratoghja di e spezie d’interessu.