Logo du site
Plateforme STELLA MARE | UAR 3514 - CNRS / Università di Corsica
Plateforme STELLA MARE  |
SPINA II
> Ricerca è Sviluppu > Prugrammi in corsu > SPINA II

SPINA II

In u Mediterraniu, l’ecusistemi di e costie sò sottumessi à certe custrette chì crescenu è chì disturbanu u so equilibriu eculogicu. In Corsica, u zinu cumunu, Paracentrotus lividus (Lamarck, 1816), spezia famosa di i lochi scugliosi è di l’erbaghji, prova un avvilimentu affannante di pettu à a regulamentazione stretta in giru à a pesca. I seguiti avviati dapoi u 2010 provanu una calata improntata da e densità è una scarsità di l’individuvi maturi, ciò chì traduce un sbilanciu d’arrulamentu. Di pettu à e cunfine di misure di gestione tradiziunale, u seguitu di e pupulazione hè diventatu una sfida primurosa per anticipà e dinamiche à longu andà è avvià azzione di ristoru mirate à u livellu di l’ecusistemi liturali corsi.
Ughjettivi

U prughjettu si scrive in a cuntinuità di l’inizii avviati in Corsica dapoi u 2018 per risponde à l’avvilimentu di e pupulazione di zini cumuni, spezia emblematica è eculogicamente strutturante di l’ecusistemi di e costie. Ghjè a prulungazione di i travaglii realizati in u quadru di i prugrammi PARARESTOR è SPINA I ch’anu permessi di pruvà l’azzione di gestione attiva cum’è a stallazione di i lucucci di vita artificiali è e prime cappiate di ghjuvanili esciuti da u spulcitoghju.

SPINA II, cuordunata da u laburatoriu STELLA MARE, hè avviata in cullaburazione incù u Parcu Naturale marinu di u Capicorsu è di l’Agriate (PNMCCA), u Cumitatu reghjunale di e pesche marittime è di l’allevi marini di Corsica è i pescatori prufessiunali lucali. Hè finanziatu da u fondu auropeanu per l’affari marittimi, a pesca è l’acquacultura, di l’uffiziu di l’ambiente di a Corsica è di u Statu.

 

 

Stu prugramma, iniziatu annantu à parechji anni, mira à capisce megliu a dinamica di e pupulazione di zini in Corsica è di sperimentà e misure cuncrete di ristoru. Riposa annantu à un’avvicinata attempu scentifica è uperaziunale fatta annantu à un partenariatu strettu trà circatori, gestiunariu è attori di terreni.

  • Seguità è mudelizà l'evuluzione di e pupulazione di P.lividus per via di u studiu di a so struttura demugrafica di u so ciculu di ripruduzzione è d'arrulamente larvariu.
  • ÉValutà è uttimizà e sfarente misure di ristoru eculogicu, sopprattuttu l'influenza di a messa in ballu di e zone di maghjera è di cappiate di ghjuvanili in mezu naturale.

Assi di travagliu

  • Assu 1 : Variabilità spaziu tempurale è dinamica di e pupulazione P.lividus

Seguiti regularii sò realizati annantu à parechji siti di u Capicorsu incù u scopu di ducumentà l’evuluzione di l’abbundanza è di a struttura in maiurezza di e pupulazione di zini cumuni. U ciculu ripruduttore di a spezia hè caratterizata da u seguitu di l’indici gunadichi è l’analisa istulogica di e gunade, permettendu di definisce e sfarente tappe di maturazione sessuale. D’altronde, i prilevamenti di zuoplanctone sò fatti à ogni staghjone per pudè valutà a prisenza è a densità di e larve in u mezu. In paragonu, u seguitu di i fondi marini include l’analisa di a cuperta vegetale è di a densità di e pupulazione di pesci. L’inseme di i dati hè integratu in un mudelu di dinamica di pupulazione mirendu à megliurà a capiscitura di e risposte di P.lividus à l’azzione antropiche è à e variazione ambientale.

 

 

  • Assu 2 : Valutazione è uttimisazione di e misure di ristoru eculogicu

L’influenza di e zone di maghjera avviate dapoi 2022 annantu à i siti d’Albu, Olzu, Malfalcu, è Barcaghju face l’ughjettu d’una valutazione specifica mirendu à quantificà l’effetti d’issa misura di gestione spaziale annantu à a densità di pupulazione di i zini cumuni. In paragonu, cappiate sperimentale di ghjuvanili esciuti di u pulcitoghju di Stella Mare sò realizati annantu à settori storichi sottumessi à una pesca maiò. St’azzione si scrivenu in una strategia di ristoru eculogicu chì l’efficacità hè valutata per via di u seguitu di e pupulazione di zini è l’analisa di l’evuluzione di i fondi marini.

 

 

« U prughjettu SPINA II hè finanziatu da i Fondi Auropeani per l'Affari Marittimi, a Pesca è l'Acquacultura, da l'Uffiziu di l'Ambiente di a Corsica è di u Statu. »